Бишкек, 16.09.25. /Кабар/. 15 жылдан бери иштебей турган Кең-Сай массивиндеги сугат суу чыгаруучу насостук станция оңдоп-түзөөдөн өткөрүлүп, пайдаланууга берилди. Бул тууралуу Ош шаарынын мэриясынан билдиришти.
Станцияны мэр Жеңишбек Токторбаев ачып, жергиликтүү жашоочулар менен жолугушту.
Бул иш мэрдин тапшырмасы менен жүргүзүлүп, бир ай ичинде оңдолуп бүттү. Станциянын тетиктери жаңысына алмаштырылып, жарактуулары оңдоп түзөөдөн өткөрүлдү.
Эми Кең-Сайлыктардын сугат суу маселеси чечилип, жаңы конуштагы жалпы 600 гектардан ашуун жерге суу бөлүштүрүлүп, жеткирилет.
Эске салсак, Ош шаарынын 3000 тургуну үчүн Кең-Сайдан 800 гектар жер тилкеси турак-жай курууга мындан 15 жыл мурун бөлүнгөн. Бирок зарыл шарттардын жоктугунан улам калктын көчүп келиши кечеңдеп келген. Эми мэр Жеңишбек Токторбаевдин тапшырмасына ылайык Кең-Сай массивин жашоого ыңгайлаштырылып, сугат жана ичүүчү суу тартылып, электр подстанциясы оңдолуп, маселелер четинен чечилүүдө.
