Бишкек, 26.11.25. /Кабар/. Бүгүн Ош шаарынын Кең-Сай конушунда 480 орундуу мектептин курулушуна мезгил кутусу салынды.
Муниципалитеттен билдиришкендей, саамалыкка мэр Жеңишбек Токторбаев жана жергиликтүү тургундар катышты.
Мектеп бардык заманбап шарттарды эске алуу менен курулат. Жылуулук берүү үчүн откана, ажаткана, баскетболдук жана волейболдук аянтча, балдар ойноочу жай жана стадион да каралган. Ошондой эле видеобайкоо, рекреациялык зоналар да камтылат.
Мэр Жеңишбек Токторбаев жергиликтүү элге ыңгайлуулук жаратуу үчүн аткаруу бийлиги тарабынан бардык аракеттер көрүлүп жатканы тууралуу маалымат берди.
Эскерте кетсек, учурда Кең-Сай массивинде бала бакчанын жана көп кабаттуу ипотекалык үйдүн курулушу да жүрүп жатат. Мындан 2 айга жакын убакыт мурун аталган обьекттерге мэрдин катышуусунда капсула салынган.
Калаа башчы өз сөзүндө конуш алдыңкы жылдарда өнүгүү жолуна түшө турганын баса белгиледи.
