Бишкек, 09.05.26. /Кабар/. Улуу Жеңиштин 81 жылдыгына карата Ош шаарында "Өлбөс полк" жүрүшү өттү. Бул тууралуу мэриядан билдиришти.
Маалыматка ылайык, Алымбек датка көчөсүн бойлой борбордук аянтка чейин миңге чукул калаа тургуну чогулуп, Улуу Ата Мекендик согушка катышкан чоң аталарынын, жакындарынын сүрөттөрүн көтөрүп чыгышты. Жүрүшкө мэр Жанарбек Акаев, шаардык кеңештин төрагасы Болот Баетов, облус жетекчисинин биринчи орун басары Мирлан Орозалиев, Россиянын Ош шаарындагы башкы консулу Роман Свистин жана шаар тургундары катышты. Мэр жүрүшкө Советтер Союзунун баатыры Чолпонбай Түлөбердиевдин сүрөтүн көтөрүп чыкты.
Жүрүштөн соң Өчпөс отко гүлчамбар коюлуп, эскерүү иш-чарасы өттү.
”Ата-бабаларыбыздын эрдиги эч качан унутулбайт. Биз аларды ар дайым сыймыктануу менен айтабыз. Азыркы бейпил жашоону алар бизге кан менен, жан менен алып беришкен. Биздин милдет – ошол баатырлардын эрдигине татыктуу болуу. Ош шаары мындан ары да гүлдөп, жаратман долбоорлор ишке аша берсин. Башкысы – элибиз тынч болсун”– деди Жанарбек Акаев.
Иш-чаранын соңунда калаа тургундарына майрамдык маанай тартууланып, концерт уюштурулду.
