Бишкек, 02.10.25. /Кабар/. Кечээ, 1-октябрда Ош шаарынын мэриясына караштуу “Боорукердик” социалдык мекемесинде Карылардын эл аралык күнүнө арналган майрамдык иш-чара болуп өттү.
Муниципалитеттен билдиришкендей, иш-чарага Ош шаарынын вице-мэри Салтанат Аманова, шаардык кеңештин төрагасынын орун басары Ниязбек Нурбаев жана “Айыл Банк” ААКсынын башкармасынын төрагасынын орун басары Эрмек Бакасов катышты.
Салтанат Аманова Ош шаарынын мэри Жеңишбек Токтобаевдин атынан куттуктоо айтып, мекеме үчүн акчалай белек жана интерактивдүү такта тапшырды. Ал эми мамлекеттик банк мекеме үчүн жаңы эмерек алып берген.
“Боорукердик” карылар үйүндө учурда 30 улгайган адам жашайт.
Белгилей кетсек, учурда Ош шаарында “Карыларга көңүл буруу жана камкордук” аттуу бир айлык кампания өтүп жатат. Анын алкагында социалдык жактан жардамга муктаж улгайган жарандарга колдоо көрсөтүлүүдө.
