Бишкек, 15.01.26. /Кабар/. Ош шаарынын Мамыров көчөсүндө дагы бир жаңы эс алуу жайы курулууда. Бул тууралуу мэриядан билдиришти.
Маалыматка ылайык, эс алуу жайы "Касиет" тойканасынан тартып Б. Осмонов көчөсүнө чейинки аймактын бир тарабына курулууда.
Бул аймакта буга чейин мыйзамсыз жайгашкан унаа тетиктерин саткан жайлар жана бир катар соода түйүндөрү болгон. Учурда алар толугу менен алынып, ордуна жөө жүргүнчүлөр үчүн ыңгайлуу тротуарлар салынууда.
Мындан тышкары, аймак жашылдандырылып, арча көчөттөрү отургузулуп, түнкү жарыктандыруучу чырактар жана эс алуучулар үчүн отургучтар орнотулууда.
