Бишкек, 01.07.25. /Кабар/. Бүгүн Ош облустар аралык балдардын клиникалык ооруканасына жаңы заманбап медициналык жабдыктар тапшырылды. Бул тууралуу президенттин аймактагы өкүлчүлүгүнөн билдиришти.
Жабдыктарды президенттин өкүлү Элчибек Жантаев тапшырып, медициналык жабдыктар облустук өнүктүрүү фонду тарабынан 3,4 млн сомго сатылып алынганын белгиледи.
Бул каражатка оорукананын жандандыруу (реанимация) бөлүмү үчүн жасалма дем алдыруучу аппарат (ИВЛ) жана эки даана кувез (инкубатор) сатып алынган.
Облус жетекчиси жабдыктар ымыркайлардын өмүрүн сактап калууда жана аларга сапаттуу медициналык жардам көрсөтүүдө маанилүү роль ойной турганын белгиледи.
"Өзгөчө салмагы аз, оор абалда төрөлгөн ымыркайлар үчүн бул жабдыктар абдан зарыл. Эми балдар коопсуз жана заманбап шартта дарылануу мүмкүнчүлүгүнө ээ болушат. Бул – мамлекеттин жана коомдун балдар саламаттыгына болгон камкордугунун дагы бир мисалы", – деди өкүл.
