Бишкек, 06.12.25. /Кабар/. Күн мурун Ош шаарынын Алымбек Датка аймактык башкармалыгындагы Алай 1 жана Алай 2 конуштарынын негизги жолдору пайдаланууга берилди.
Муниципалитеттен билдиришкендей, иш-чарага мэр Жеңишбек Токторбаев жана жергиликтүү тургундар катышты.
Калаа башчысынын август айындагы рейддик кыдыруусунда Алай 1, Алай 2 конуштарынын тургундарына жолугуп көйгөйлөрдү жеринен көрүп чыккан. Анда жергиликтүү тургундар аталган конуштардын жолуна асфальт төшөп берүүнү айтып кайрылышкан.
Жыйынтыгында мэр тийиштүү кызматтарга тапшырмаларды берип, конуштардын инфраструктурасын кыска убакытта жакшыртуу боюнча иштер жасалды.
Анын ичинде болжол менен 2,5 чакырым жолго асфальт төшөлүп, жөө жүргүнчүлөр үчүн тротуарлар курулду. Ошондой эле ирригациялык лотоктор орнотулуп, түнкү чырактар дагы коюлган.
