Бишкек, 26.05.26. /Кабар/. Бүгүн Ош шаарынын мэриясында Жарандык коргонуу комиссиясынын отуруму өттү.
Муниципалитеттен билдиришкендей, анда шаардагы сел жүрүү жана суу каптоо коркунучтарынын алдын алуу маселеси каралды. Жыйынга шаардык мэриянын тиешелүү мекеме-ишканаларынын жетекчилери жана кызматкерлери катышты.
Жөшөрлүү жаандан улам шаардагы үйлөрдүн жер төлөлөрүн суу каптоо фактылары катталууда. Шаар мэри Ж. Акаев жарандардын коопсуздугу башкы милдет экенин эскертип, ӨКМди бул маселени реалдуу чечүү жолдорун издөөгө чакырды.
Министрлер кабинетинин тапшырмасы менен шаардын жарандык коргонуу кызматтары "Жогорку даярдык" режимине өткөрүлдү. ӨКМдин Ош шаардык башкармалыгынын башчысы Улан Жусубалиев учурда 200гө жакын кызматкер күжүрмөн даярдыкта турганын жана бул күчтөр дагы күчөтүлөрүн билдирди.
Жыйынтыгында кооптуу аймактарды көзөмөлдөө, арыктарды тазалоо жана авариялык топтордун даярдыгын камсыз кылуу боюнча так тапшырмалар берилди. Ар бир жетекчи тапшырмалардын сапаттуу аткарылышы үчүн жеке жоопкерчилик тартаары эскертилди.
