Бишкек, 29.08.25. /Кабар/. Ошто социалдык көйгөйлөр жана калктын муктаждыктары талкууланды. Бул тууралуу Эмгек, социалдык камсыздоо жана миграция министрлигинен билдиришти.
Талкуу президенттин Ош облусундагы өкүлүнүн аппараты менен биргеликте уюштурулуп, калктын аймактагы актуалдуу көйгөйлөрү жана муктаждыктары каралды.
Иш-чарага жергиликтүү өз алдынча башкаруу органдарынын өкүлдөрү, Министрликтин аймактык башкармалыктарынын жетекчилери жана айыл аймактардын социалдык кызматкерлери катышты.
Жыйында майыптыгы бар адамдардын, турмуштук оор кырдаалга туш болгон балдардын, анын ичинде ата-энелери миграцияда жүргөндөрдүн маселелери, мамлекеттик жөлөкпулдардын дайындалышы жана төлөнүшү, коомдук акы төлөнүүчү иштердин өлчөмүн көбөйтүү зарылдыгы боюнча маселелер көтөрүлдү.
Мындан тышкары, аймактык башкармалыктардын жетекчилери калктын аялуу катмарын тейлеген социалдык кызматкерлердин эмгек акысынын төмөндүгүн өзгөчө белгилешти. Айыл өкмөттөрдүн социалдык кызматкерлери болсо аз камсыз үй-бүлөлөр үчүн электрондук социалдык паспортторду түзүүдө пайда болгон техникалык кыйынчылыктарды айтып өтүштү.
Жыйындын жыйынтыгында аталган маселелер боюнча сунуштар даярдалып, аларды борбордук органдардын жана президенттин облустардагы өкүлдөрүнүн 2026-жылга карата биргелешкен иш-планына киргизүү чечими кабыл алынды.
