Бишкек, 26.09.25./Кабар/. Бүгүн Ош шаарында "КР президентин жана Жогорку Кеңешинин депутаттарын шайлоо жөнүндө" конституциялык мыйзамына киргизилген өзгөртүүлөргө байланыштуу калк арасында түшүндүрүү иштерин жүргүзүү максатында жыйын өттү.
Мэриядан билдиришкендей, жыйынга Ош шаарынын мэринин орун басары Адилет Шаршеналы уулу, Борбордук шайлоо комиссиясынын мүчөсү Абдыжапар Бекматов жана шаар тургундары катышты.
Абдыжапар Бекматов өзгөртүүлөргө кеңири токтолуп, маалымат берди. Атап айтканда, алдыдагы шайлоолордо Кыргызстандын жарандары аралыктан добуш бере алышат. Онлайн идентификация аркылуу ар бир жаран өзүнүн округунан сырткары каалаган жердеги шайлоо участкасынан добуш берүү мүмкүнчүлүгүнө ээ болот. Ошондой эле ал "Бир шайлоочу – бир талапкер – бир добуш" эрежеси тууралуу түшүндүрмө берип, добуш берүү тартиби менен тааныштырды.
Андан тышкары, БШК мүчөсү талапкерлерге коюлган талаптарга да токтолду.
Эскерте кетсек, алдыдагы парламенттик шайлоодо 90 депутат 30 көп мандаттуу аймактык шайлоо округунан шайланып келет. Алардын ичинен 30 эл өкүлү аялдар болушу зарыл.
