Бишкек, 28.02.26. /Кабар/. Ош шаарындагы Ж.Мамытов атындагы мектепке 300 орундуу заманбап кошумча корпус курулат. Бул тууралуу муниципалитеттен билдиришти.
Бүгүн курулушка расмий түрдө мезгил кутусу салынды. Иш-чаранын жүрүшүндө шаар мэри Жанарбек Акаев жаңы окуу имаратынын пайдубалын түптөө — бул балдарыбыздын билимине, келечегине салынган маанилүү инвестиция экенин белгиледи.
Президенттин демилгеси менен быйыл Ош шаарында мектептердин тартыштыгын жоюу максатында ири курулуштар жүрөт. Республикалык бюджеттен 10 мектеп, ал эми шаардык бюджеттен 3 мектеп жана бала бакчалар болуп, жалпысынан 15 социалдык объект курулат. Ошондой эле жеке мектеп курууну көздөгөн ишкерлерге мамлекет тарабынан ар тараптуу колдоо көрсөтүлөрү маалымдалды.
Белгилей кетсек, курулуш иштери бекитилген графикке ылайык жүргүзүлүп, ушул жылдын ноябрь айында толук аяктап, пайдаланууга берүү пландалууда.
