Бишкек, 16.10.25. /Кабар/. Ошто мамлекеттик кызматкерлерге шайлоо өнөктүгүнө аралашпоо эскертилди. Бул тууралуу Ош шаарынын прокуратурасы тарабынан Жогорку Кеңештин депутаттарын мөөнөтүнөн мурда шайлоону даярдоодо жана өткөрүүдө Конституциянын жана мыйзамдардын сакталышын камсыз кылуу боюнча өткөн жыйында айтылды.
Мэриядан билдиришкендей, ага шаардагы укук коргоо органдарынын жетекчилери, мекеме-ишканалардын жана аймактык башкармалыктардын башчылары, аймактык жана участкалык шайлоо комиссиясынын төрагалары катышты.
Мында шайлоого мамлекеттик жана муниципалдык кызматкерлердин аралашуусуна жана административдик ресурска жол берилбестиги эскертилди. Ошондой эле аймактык шайлоо комиссиясынын өкүлү бул жолку шайлоо мыйзамдарына киргизилген өзгөртүүлөр жана толуктоолор, шайлоо участкаларынын чек аралары боюнча жетиштүү маалымат берди.
Жыйын шайлоо өнөктүгүнө байланыштуу суроолор менен улантылып, тиешелүү кызмат өкүлдөрү жоопторду беришти.
