Бишкек, 30.03.26. /Кабар/. Бүгүн, 30-мартта Ош мэриясынын кезектеги коллегиясы өттү. Бул тууралуу муниципалитеттен билдиришти.
Маалыматка ылайык, анда коомдук коопсуздукту камсыздоо жана кылмыштуулуктун алдын алуу боюнча жүргүзүлүп жаткан иштер талкууланды. Калаа башчысы Жанарбек Акаев шаар тургундарынын коопсуздугу биринчи орунда экенин белгилеп, видеокөзөмөл камераларын сатып алууда каражатты үнөмдөбөстөн, жетиштүү деңгээлде камсыздоо зарылдыгын айтты. Көзөмөл системаларын кеңейтүү коопсуздукту жогорулатып, кылмыштуулукту азайтууга өбөлгө түзөрүн билдирди.
Ошондой эле мэр майыптыгы бар адамдардын укуктарын коргоо, жашоо шарттарын жакшыртуу, инфратүзүмгө жеткиликтүүлүктү камсыздоо жана реабилитациялык кызматтарды өнүктүрүү зарылдыгын белгиледи.
Жыйындын соңунда шаар мэри тиешелүү кызматтарга ыкчам жана жоопкерчиликтүү иш алып барууну тапшырды. Көтөрүлгөн көйгөйлөрдү чечүү, кемчиликтерди жоюу жана ишти натыйжалуу жүргүзүү боюнча тиешелүү токтомдор кабыл алынды.
