Бишкек, 10.06.26. /Кабар/. Ош шаардык мэриясы үй-бүлөлүк зомбулукка каршы күрөштү жана анын алдын алуу иштерин активдүү улантууда.
Муниципалитеттен билдиришкендей, бул багытта "Эдвокаси борбору" менен биргеликте "Үй-бүлөлүк зомбулуктун алдын алуу жана жабыр тарткандарды коргоо боюнча мекемелер аралык өз ара аракеттенүү жолдору" аталышындагы эки күндүк окуу семинарын өткөрүп жатат.
Окуу семинарынын алкагында үй-бүлөлүк зомбулуктун алдын алуу жаатында мамлекеттик органдардын ортосундагы биргелешкен иш-аракеттерди күчөтүү жана зомбулуктан жабыркагандарга өз убагында жардам көрсөтүү маселелери каралууда. Ошондой эле катышуучу адистердин кесиптик билимдерин жана тажрыйбаларын жогорулатууга өзгөчө көңүл бурулууда.
Иш-чарага мэрдин орун басары Масуда Айдарбекова, милициянын аймактык инспекторлору, ички иштер органдарынын тергөөчүлөрү, социалдык кызматкерлер жана муниципалдык аймактык башкармалыктардын (МАБ) башчылары катышууда.
