Бишкек, 12.05.26. /Кабар/. Ош шаарындагы Барпы Алыкулов мектебине 1200 орундуу кошумча корпус курулууда. Бул тууралуу Курулуш министрлиги билдирет.
Долбоор мамлекеттик казынанын эсебинен ишке ашырылып, аймактагы мектеп тартыштыгын жоюуга багытталган.
Башкы план боюнча жалпы аянты 13 миң 610 чарчы метрди түзгөн, 4 кабаттуу, 5 блоктон турган мектеп салынат. Анда заманбап окуу класстары, лаборатория, китепкана, ашкана, жыйындар залы, эмгек жана компьютердик класстар, ошондой эле бардык шарттары каралган спорт зал болот.
Учурда курулуш иштери тынымсыз жүргүзүлүп, объектте эки нөөмөт менен 87 жумушчу эмгектенүүдө.
Белгилей кетсек, учурдагы мектеп 1987-жылы курулган. Бүгүнкү күндө анда 2000ге жакын окуучу билим алууда.
