Бишкек, 10.03.25. /Кабар/. Ош облустар аралык балдар клиникалык ооруканасында жаңы заманбап санариптик рентген аппараты ишке киргизилди. Бул тууралуу Саламаттык сактоо министрлигинен билдиришти.
Медициналык жабдуу Саламаттык сактоо министрлигинин колдоосу жана Бүткүл дүйнөлүк банктын "Баштапкы медициналык-санитардык жардамдын сапатын жакшыртууну кошумча каржылоо программасы" долбоорунун алкагында каржыланды.
Буга чейин ооруканада бир эле рентген кабинети иштеп, кабыл алуу бөлүмүндө кезек көп болуп, оор абалдагы бейтаптарды ташууда ыңгайсыздыктар жаралган. Бул көйгөйдү чечүү максатында кеңеш берүү жана дарт аныктоо бөлүмүндө кошумча коридор курулуп, амбулатордук бейтаптар үчүн атайын жаңы бөлмө даярдалды.
Оорукананын директору Жыргалбек Жороев бул жаңы жабдуу жаш балдардын ден соолугун коргоо жана медициналык тейлөөнү жакшыртуу максатында жасалганын белгиледи.
"Дени сак коомду түзүү – жаш балдарга шарт түзүү жана камкордук көрүү. Анткени алар – улуттун келечеги", – деди ал.
