Бишкек, 05.02.26. /Кабар/. Ош шаарындагы Алымбек датка көчөсүнүн жашоочулары Эне-Сай конушуна көчүрүлөт. Бул тууралуу бүгүн калаа башчысы Жеңишбек Токторбаев тиешелүү мекеме-ишканалардын жетекчилери менен биргеликте жүргүзгөн кезектеги рейдинде айтты.
Муниципалитеттен билдиришкендей, мэр Алымбек датка көчөсүн кеңейтүү максатында жолго тоскоолдук жараткан мыйзамсыз объекттерди жана жол жээгиндеги курулуштарды алып салуу, ошондой эле айрым турак жай объектилерин соода-сатык жай катары мыйзамсыз пайдаланган учурларды аныктоо жана демонтаждоону тапшырды.
Шаар мэри аталган көчөнү кеңейтүү иштерине байланыштуу айрым турак жай ээлери Эне-Сай конушуна көчүрүлөрүн маалымдады.
"Учурда ишке ашырылып жаткан долбоорлор шаар инфраструктурасын жакшыртууга багытталган", - деп айтылат маалыматта.
