Бишкек, 25.04.26. /Кабар/. Ош шаарында мектеп окуучулары арасында “Дени сак окуучу” аталышындагы спорттук иш-чара өттү.
Муниципалитеттен билдиришкендей, борбордук стадиондо уюштурулган мелдешке шаардагы 57 мектептен жалпы 900гө жакын окуучу катышып, ар кыл спорттук мелдештерде күч сынашты.
Иш-чаранын негизги максаты – жаш муунду сергек жашоого үндөө, спортко болгон кызыгуусун арттыруу жана окуучулардын ден соолугун чыңдоо болуп саналат. Катышуучулар командалык жана жекече таймаштарда өз өнөрлөрүн көрсөтүп, активдүү катышуу менен өз ара ынтымакты жана достукту бекемдешти.
Мелдештин жыйынтыгында мыкты көрсөткүчкө жетишкен командалар жана окуучулар аныкталып, шаардык мэрия тарабынан сыйлыктар жана дипломдор менен сыйланышты.
