Бишкек, 04.08.26. /Кабар/. Ош мамлекеттик педагогикалык университетинде түштүк аймактагы усулчулар үчүн 2026-2027-окуу жылына даярдыкка арналган төрт күндүк окутуу башталды.
Агартуу министрлигинин маалыматына ылайык, 7-августка чейин өтө турган иш-чарага Ош шаарынын, Ош, Жалал-Абад жана Баткен облустарынын билим берүү тармагынан 256 усулчу катышууда.
Окутуунун жүрүшүндө адистер жаңы мамлекеттик билим берүү стандарттары, окуу программалары, окуу-методикалык комплекстер жана заманбап педагогикалык технологиялар боюнча билим алышат.
Иш-чараны Педагогикалык кызматкерлердин квалификациясын жогорулатуу жана кайра даярдоо республикалык институтунун, Кыргыз билим берүү академиясынын жана "Окуу китеби" басма үйүнүн адистери өткөрүүдө.
Белгиленгендей, өлкө боюнча жалпысынан 455 тажрыйбалуу усулчу конкурстук негизде тандалып, жаңы окуу жылында мугалимдерге усулдук колдоо көрсөтүү үчүн даярдалууда.
