Бишкек, 24.09.25. /Кабар/. Ош мамлекеттик университетинин окутуучулары, профессор Аида Келдибекова, улук окутуучу Жылдыз Тойчуева, доцент Жайнагүл Абдирасулова жана Мээримгүл Бусурманкул кызы 14–19-сентябрь күндөрү Польшанын Быдгощ шаарында такшалмадан өтүштү.
ОшМУдан билдиришкендей, алар Польшанын эмчек рагын алдын алуу жана эрте аныктоо тажрыйбасын үйрөнүп, онкологиялык борборлор менен таанышты. Андан сырткары студенттерге өз алдынча текшерүү ыкмаларын үйрөтүү үчүн методикалык материалдарды иштеп чыгуу жана алдын алуу иш-чараларын уюштурууга катышты.
Программанын алкагында эмчек рагынын эпидемиологиясы, клиникалык белгилери, коркунуч факторлору боюнча лекцияларга катышты. Практикалык сабактар жана муляждар менен иштөө ыкмалары, Кыргызстанга ылайыкташтырылган методикалык материалдарды даярдоону үйрөнүштү.
Окутуучулар онколог-хирург-маммолог, профессор Витольд Ковальский менен болгон тегерек столго да катышты. ОшМУнун окутуучуларын жана студенттерин даярдоонун планы жана графиги түзүлдү. Жыйынтыгында сертификаттарга ээ болушту.
Белгилей кетсек, аталган окутуу RITA “Айтмактагы өзгөрүүлөр” долбоорунун алкагында уюштурулуп, Польша-Америка Эркиндик фонду колго алып, WSG университети жана AZS WSG уюму колдоо көрсөттү.
