Бишкек, 19.11.25. /Кабар/. Бүгүн президенттин Ош облусундагы өкүлү Элчибек Жантаев Япониянын Эл аралык кызматташтык агенттигинин (JICA) Кыргызстандагы туруктуу өкүлү Котаро Нишигата менен жолугушту.
Өкүлчүлүктөн билдиришкендей, жолугушууда JICAнын Ош облусунда ишке ашырып жаткан "Спутниктик маалыматтар жана химиялык заттардын регионалдык ташылышын моделдөөдөн" негизделген абанын сапатын баалоо системасын иштеп чыгуу долбоорунун алкагында ОшМУда илимий борбор ачуу пландалып жатканы белгиленди.
Ошондой эле Ош облустук клиникалык ооруканасына жана облустук онкологиялык борборго гранттык негизде медициналык жабдууларды берүү, Ош эл аралык аэропортунда аэронавигация үчүн жаңы мунара орнотуу маселелери айтылды.
Элчибек Жантаев Япония өкмөтүнө жана JICA Кыргызстанда билим берүү, мамлекеттик кызматкерлерди окутуу, "Бир айыл – бир продукт" программасы, транспорт инфраструктурасы, тоо-кен жана кайра иштетүү тармактары, ошондой эле маданият, искусство жана археология боюнча демилгелерди колдоп жатканын баса белгиледи.
Анын айтымында, бул долбоорлор Ош облусунун өнүгүүсүнө, инфраструктуранын жаңылануусуна жана жергиликтүү тургундардын жашоо шартын жакшыртууга олуттуу салым кошууда.
