Бишкек, 30.01.25. /Кабар/. Күн мурун Ош шаарынын мэри Жеңишбек Токторбаев “Сулайман-Тоо” муниципалдык аймактык башкармалыгынын тургундары менен жолукту. Бул тууралуу муниципалитеттен билдиришти.
Жыйынга ошондой эле Ош шаардык кеңешинин төрагасы Болот Баетов, мекеме-ишканалардын жетекчилери да катышты.
Алгач шаар жетекчиси жергиликтүү тургундар менен таанышып, шаарды өнүктүрүү багытында быйылкы жылы аткарылуучу алгылыктуу иштер боюнча айтып берди.
Андан соң муниципалдык аймактык башкармалыгынын башчысы 2024-жыл ичинде жасалган жумуштар, ийгиликтер менен бөлүштү.
Жыйындын жүрүшүндө жарандардан жол, жылуулук, мектепти оңдоп-түзөө, мыйзамсыз курулуш, күн панелдерди орнотуу, экология, жашылдандыруу, билим берүү, эмгек акы, коммуналдык маселелер туурасында суроолор берилип, шаар мэри тарабынан жооп берилди.
Ошондой эле тийиштүү жетекчилерге жыйындан соң, жерине барып айрым көйгөйлөрдү көрүп келүүгө тапшырмалар берилди.
Белгилей кетсек, шаар башчысынын эл менен болгон жолугушуусу жылына эки ирет өтүп келет. Бул иш-аракет шаар көйгөйүн жеринде чечип, зарыл жумуштарды ирети менен аткарууга өбөлгө түзөт.
