Бишкек, 25.04.26. /Кабар/. Ош шаарынын аймагында дагы бир жашыл аймак пайда болду. Бул тууралуу муниципалитеттен билдиришти.
Бүгүн "Манас-Ата" аймактык башкармалыгында жаңы скверге көчөттөр тигилип, аймакты жашылдандыруу иштери башталды.
Иш-чарага Ош шаарынын мэринин орун басары Эрнис Толтоев, "Мега" компаниясынын Оштогу өкүлдөрү жана жергиликтүү тургундар катышты.
Отургузулган көчөттөр мамлекеттик "Мега" компаниясы тарабынан шаардын климаттык шарттарына ылайык тандалып алынган.
Белгилей кетсек, аталган аймак буга чейин кароосуз калып келген. Учурда ал толук иретке келтирилип, жакынкы күндөрү тургундар үчүн чакан сейил бакка айландырылып, пайдаланууга берилет.
