Бишкек, 26.05.25. /Кабар/. Бүгүн, 26-май күнү Ош шаарындагы бардык мектептерде “Акыркы коңгуроо” аземи болуп өттү.
Ош мэриясынан билдиришкендей, мамлекеттик билим берүү мекемелеринде өткөн майрамдык иш-чараларга жергиликтүү өз алдынча башкаруу органдарынын бардык өкүлдөрү катышты.
Ош шаарынын мэри Жеңишбек Токторбаев майрамдык иш-чаранын алкагында №52 «Кыргыз түрк достугу» атындагы лицей-мектебинде болуп, жалпы бүтүрүүчүлөрдү мектепти аяктап жатканы менен куттуктады.
Шаар башчысы өз сөзүндө мектепте алынган билим — окуучулардын келечектеги кесиптик өсүүсүнүн бекем пайдубалы экенин, мугалимдердин жаш муундарды тарбиялоо жана окутуудагы жан аябас эмгеги баа жеткис экенин белгиледи.
Иш-чаранын жүрүшүндө билим берүү тармагын өнүктүрүүгө кошкон салымы үчүн өзгөчөлөнгөн мугалимдер Ош шаарынын мэриясынын Ардак грамоталары менен сыйланышты.
Ош шаарында бүгүнкү күндө жалпысынан 70 мамлекеттик жана 52 жеке менчик мектеп бар. Быйыл мектептерди 10467 бүтүрүүчү бүтүрсө, анын 2375си 11-классты, 8092и 9-классты бүтүргөндөр.
