Бишкек, 17.02.25. /Кабар/. Бүгүн Ош шаарынын мэри Жеңишбек Токторбаев Курманжан-Датка муниципалдык аймактык башкармалыгындагы Н.Исанов көчөсүн кыдырып чыкты.
Муниципалитеттен билдиришкеней, шаар башчысы Н.Исанов көчөсүнүн эки тарабын таштандылардан тазалоо жана шаар тургундарынын эс алуусу үчүн жашыл аянттарды түзүү, кызыл сызыкка чыгып кеткен курулуштарды бузуп алып салуу, жашыл аймактарды көрктөндүрүү жана жашылдандыруу боюнча тапшырмаларды койду.
Ошондой эле бул аймакта жайгашкан жеке медициналык мекемелердин жерди ижарага алуу келишиминин шарттарын кайра карап чыгуу зарылдыгын белгилеп, Ак-Буура дарыясынын корук аймактарында жайгашкан курулуштарды алып салуу боюнча жумуштарды баштоону тапшырды.
Шаар башчысы Жеңишбек Токторбаев мындан сырткары, бул аймакта шаардыктардын эс алуусу үчүн жеткиликтүү жайлар жок экенин айтып, бак болуучу жерлерге мыйзамсыз курулуп, каралбай калган курулуштарды тез арада жашыл аймактардан бошотуу боюнча тапшырмаларды берди. Аны менен катар ушул жерде жайгашкан жогорку окуу жайлардын алдындагы, жол жээгине чыгып кеткен унаа токтотуучу жайларды жылдыруу боюнча билдирүүлөрдү жөнөтүүнү милдеттендирди.
