Бишкек, 02.07.25. /Кабар/. Ош шаарында 2,6 гектар аянтта заманбап эс алуу багынын курулушу жүрүүдө.
Муниципалитеттен билдиришкендей, жасалып жаткан иштердин жүрүшү менен мэр Жеңишбек Токторбаев жеринен таанышып, тиешелүү кызматтарга курулушту сапаттуу жана мөөнөтүндө бүткөрүүнү тапшырды.
Калаа башчысы шаар ичиндеги кароосуз, пайдаланылбай турган жерлерди жашоочулар үчүн жалпы максатка пайдалануу, жашыл аймактарды, эс алуу аянтчаларын көбөйтүү зарылдыгын белгиледи.
Ошондой эле Жекелик (Яккалик) дарыясынын суу корук аймагын жеке тараптардын тосуп алган жерлерин бошотуу, жээктен 10 метрге чейин жылдырууну тапшырды.
Жаңы сквердин аймагында төмөнкү объектилер курулат:
- 156 унаага ылайыкталган үч кабаттуу унаа токтотуучу жай;
- кичи футбол аянтчасы;
- заманбап талаптарга жооп берген ажатканалар (rest-room);
- эс алуучулар үчүн кафе;
- башкы кире бериш бөлүгүндө декоративдик арка.
Учурда эс алуу багында суугат системалары орнотулуп, жөө жүрүүчүлөр үчүн тротуарларга таман таштар төшөлүүдө.
