Бишкек, 16.03.26. /Кабар/. Ош шаарында жаңы өндүрүш зоналары түзүлөт. Бул тууралуу мэриядан билдиришти.
Күн мурун калаа башчысы Жанарбек Акаев тиешелүү мекеме-ишканалардын жетекчилери менен бирге шаар четинде жайгашкан, келечекте өндүрүштүк зоналарды түзүүгө ыңгайлуу аймактарга барып, ал жерлердин учурдагы абалы жана мүмкүнчүлүктөрү менен жеринен таанышты.
Мэр жаңы өндүрүш зоналары шаар экономикасын өстүрүп, ишкерлерге шарт түзөрүн жана калкты жумуш менен камсыздай турганын белгиледи.
Ал шаарды өнүктүрүү алкагында төмөнкү аймактарда өндүрүш зоналарын түзүү пландалып жатканын айтты:
- Озгур айылы — агрардык өндүрүш;
- Жапалак — тамак-аш өнөр жайы; Алымбек Датка — оор өнөр жай;
- Жибек Жолу — жеңил өнөр жай.
Бул демилге өндүрүштү иретке келтирип, шаардын экономикалык потенциалын жогорулатууга багытталган. Шаар мэри тиешелүү кызматтарга белгиленген аймактарда келечектеги өндүрүш зоналарын түзүү боюнча деталдуу пландарды иштеп чыгуу боюнча тапшырмаларды берди.
Бул иштер этап-этабы менен ишке ашырылып, жакынкы жылдары Ош шаарында жаңы өндүрүштүк ишканаларды ачууга кеңири мүмкүнчүлүк түзүлөт.
