Бишкек, 30.11.25. /Кабар/. Бүгүн, 30-ноябрда Жогорку Кеңештин депутаттарын мөөнөтүнөн мурда шайлоо активдүү жүрүүдө.
Ош шаарынын мэриясынын маалыматына ылайык, шаарда жалпы 105 шайлоо тилкеси бар. Анын 66сы №6 округга, 35и №5 округга, 4ү №7 округга карайт. Ал эми Кара-Суу районунун Папан айыл аймагы толугу менен (9 участка) №6 шайлоо округуна кирет.
Шаарда 161 миңден ашуун шайлоочу бар.
Ош шаарынын мэри Жеңишбек Токторбаев №5283 шайлоо тилкесинде аралыктан добуш берип, жарандык милдетин аткарды.
Мэр шаар тургундарын шайлоого активдүү катышууга жана өлкөнүн келечегине кайдыгер карабоого чакырды. Быйылкы шайлоону таза жана ачык өткөрүү үчүн бардык шарттар түзүлгөнүн белгиледи. Ошондой эле тиешелүү органдарга добуш сатып алуу сыяктуу мыйзамсыз аракеттер байкалса, аларга тыкыр көңүл бурууну эскертти.
Белгилей кетсек, жергиликтүү бийлик органдары парламенттик шайлоону уюштуруу үчүн бардык добуш берүү тилкелерин талапка ылайык жабдып, шарттарды камсыздаган.
