Бишкек, 07.08.25. /Кабар/. Аймактарга заманбап реабилитациялык борборлор керек, - деди эмгек, социалдык камсыздоо жана миграция министри Равшанбек Сабиров Ошто жаңы реабилитациялык борборду куруу үчүн бөлүнгөн жер тилкесин көрүү учурунда.
Ведомстводон маалымдашкандай, министрдин аймакка жумушчу сапарынын максаты майыптуулугу бар жарандарга , анын ичинде физикалык жана менталдык түрдө ар кандай оорулары бар адамдарга комплекстүү социалдык реабилитация кызмат көрсөтө турган мекемени жайгаштыруу мүмкүнчүлүктөрүн изилдөө болгон.
Борбор жыл бою үзгүлтүксүз иштеп, заманбап стандарттарга ылайык курулат жана куруу жана керектүү жабдуулар менен камсыз кылуу үчүн каражат президенттин резервдик фондунан бөлүнөт.
Министр белгилегендей, реабилитациялык инфраструктураны аймактарда өнүктүрүү – мамлекеттик социалдык саясаттын артыкчылыктуу багыттарынын бири. Жаңы борбор ден соолугунун мүмкүнчүлүктөрү чектелген адамдардын жашоо сапатын жакшыртууга жана социалдык коргоо тутумун бекемдөөгө олуттуу салым кошот.
