Бишкек, 29.08.25. /Кабар/. Ош шаарында №11 Валентина Терешкова атындагы жатак мектеби ачылды. Иш-чарага президент Садыр Жапаров, министрлер кабинетинин мүчөлөрү, Россиядан келген өкүлдөр катышты.
Мамлекет башчысы белгилегендей, бул жатак мектептин ачылыш аземине мектепке ысымы ыйгарылган космонавт, СССРдин баатыры Валентина Терешкова аралыктан катышты. 720 орундуу билим берүү мекемеси миңдеген окуучуларды тарбиялап, өлкөнүн ар кыл тармактарында эмгектенген көрүнүктүү инсандарды, анын ичинде Жогорку Кеңештин депутаттары, министрлерди, коомдук, саясий жана маданий ишмерлерди чыгарган. Бүтүрүүчүлөрүнүн катарында министрлер кабинетинин төрагасынын орун басары – УКМК төрагасы Камчыбек Ташиев да бар.
Учурда жатак мектепте көп балалуу, аз камсыз болгон жана оор турмуштук шартта жашаган үй-бүлөлөрдүн балдары билим алат.
Жатак мектеп 1963-1964-жылдары курулган. Бүгүнкү күндө окуу жай толук реконструкциялоодон өттү.
“Бул мектептен мамлекеттин социалдык-экономикалык өнүгүшүнө салым кошо турган инсандар чыксын. Мугалимдер жамаатына албан-албан ийгиликтерди каалайм”, - деди өлкө башчысы.
