Бишкек, 28.06.25. /Кабар/. Ош шаарында алгачкы муниципалдык социалдык жатакана ачылды. Бул тууралуу мэриядан билдиришти.
Ош шаарынын мэри Жеңишбек Токторбаев кызматка келген күндөн тартып коомчулукта турак-жай сурап кайрылган жарандардын арты үзүлбөй келет. Алардын басымдуу бөлүгүнүн батирге акча төлөө мүмкүнчүлүгү жок же болбосо кароосу жетишсиз жана майыптыгы барлар.
Бул көйгөйдү чечүү үчүн шаар башчысы бош, пайдаланылбай турган имаратты толук шарттары менен капиталдык оңдоп-түзөөдөн өткөртүп, муктаждарды жайгаштыруу чечимин кабыл алган.
Күн мурун аталган социалдык жатакана ачылып, пайдаланууга берилди. Ага калаа башчысы Жеңишбек Токторбаев, шаардык кеңештин төрагасы Болот Баетов, жергиликтүү тургундар, мекеме-ишкана жетекчилери катышты.
Үч кабаттан турган жатаканада 45 бөлмө болуп, ар бир кабатта бардык шарттары менен ашкана, даараткана жана жуунучу бөлмөлөр каралган. Бул жерге жайгаштырыла турган үй-бүлөлөрдү атайын комиссия социалдык абалын карап чыгып, уруксат берет.
Жашоочулар 6 айдан тарта 2 жылга чейин жашай алат. Бул аралыкта аларга жумуш орун таап берилип, андан ары өз жашоосун жолго коюп алууга багыт берилип, көмөк көрсөтүлөт. Ошондой эле коммуналдык бардык төлөмдөрдөн бошотулат.
