Бишкек, 13.05.2025. /Кабар/. Бүгүн президенттин Ош облусундагы өкүлү Элчибек Жантаев Кытайдын Кыргызстандагы элчиси Лю Цзянпин менен жолукту.
Өкүлчүлүктөн билдиришкендей, жолугушууда тараптар кыргыз-кытай кызматташтыгынын учурдагы абалы жана келечеги тууралуу пикир алышып, ар тараптуу кызматташтыкты өнүктүрүү боюнча макулдашышты.
Элчибек Жантаев элчини жаңы кызмат орду менен куттуктап, анын ишмердүүлүгүнө ийгилик каалады.
Тараптар Ош облусунун экономикалык жана инвестициялык мүмкүнчүлүктөрүнө токтолуп, айыл чарба, жеңил өнөр жай, туризм жана логистика тармактарында кызматташууну тереңдетүү жолдорун талкуулашты. Ошондой эле билим берүү, саламаттыкты сактоо жана маданият тармактарындагы кызматташтык маселелери көтөрүлдү.
Жолугушууда Ош мамлекеттик университетиндеги Конфуций институтунун ишмердүүлүгү жана кыргыз студенттеринин Кытайда билим алуу мүмкүнчүлүктөрү тууралуу да сөз болду.
Жолугушуунун жыйынтыгында эки тарап мындан аркы кызматташтыкты чыңдоо жана тереңдетүү боюнча өз ара даяр экендиктерин билдиришти.
