Бишкек, 01.06.26. /Кабар/. Бүгүн президенттин Ош облусундагы өкүлү Аманкан Кенжебаев Кыргызстандын грек-рим күрөшү боюнча көп жолку чемпиону, эл аралык даражадагы спорт чебери Акжол Махмудовду кабыл алды.
Өкүлчүлүктөн билдиришкендей, жолугушууда өкүл Акжол Махмудовдун жетишкендиктери менен куттуктап, алдыдагы эл аралык мелдештерине ийгилик каалады. Ошондой эле спортчунун келечектеги пландары тууралуу пикир алышып, облус жетекчилиги ар дайым колдоо көрсөтө турганын айтты.
"Сиздей мекендин желегин желбиреткен, дүйнөлүк аренада кыргызды даңазалаган спортчулар менен сыймыктанабыз. Сиздин эмгегиңиз, эрдигиңиз жаш муунга чоң үлгү. Алдыдагы мелдештериңизде да ийгилик жаратып, байге ээлеринин катарынан көрүнөсүз деген терең ишеничтебиз", - деди Кенжебаев.
Өз кезегинде Акжол Махмудов жылуу кабыл алып, колдоо көрсөткөнү үчүн ыраазычылык билдирип, алдыдагы мелдештерде дагы Кыргызстандын желегин бийик көтөрүүгө бардык күч-аракетин жумшай турганын билдирди.
Маалымат үчүн: Акжол Махмудов дүйнөнүн эки жолку (2022, 2023), Азиянын үч жолку (2018, 2022,2023), Азия оюндарынын бир жолку (2023) чемпиону жана 2018-жылкы күмүш байгесинин ээси. Токиодогу Олимпиада оюндарынын (2020) күмүш жана Париж Олимпиадасында (2024) коло медалдын ээси болгон. Кыргызстандын күрөш боюнча көп жолку чемпиону. Эл аралык даражадагы спорт чебери.
