Бишкек, 21.03.26. /Кабар/. Бүгүн Нооруз майрамы Ош облусунун жети районунда кеңири жана салтанаттуу белгиленди.
Президенттин облустагы өкүлчүлүгүнөн билдиришкендей, майрамдык иш-чараларга облус башчысынын орун басарлары катышты.
Алар район тургундарын облус жетекчиси Аманкан Кенжебаевдин жана өздөрүнүн атынан жаздын жана жаңылануунун символу болгон Нооруз майрамы менен кызуу куттуктап, ынтымак, береке жана тынчтык каалашты.
Облус башчысынын биринчи орун басары Илияз Ташбаев Кара-Суу районунда өткөн майрамдык иш-чарага катышып, элди улустун улуу күнү – Нооруз майрамы менен куттуктады.
Майрамдык иш-чаралар маданият кызматкерлери тарабынан даярдалган концерттик программалар жана улуттук спорттук оюндар менен коштолду.
