Бишкек, 28.07.25. /Кабар/. Кыргыз футбол биримдигинин жетекчилери Ош, Кара-Суу жана Өзгөн шаарларындагы футбол инфраструктурасынын абалы жана өнүгүшү боюнча көчмө жыйындарды өткөрдү. Бул тууралуу Кыргыз футбол биримдигинен билдиришти.
Иш сапардын алкагында Ош шаарындагы А.Момунов атындагы футбол академиясы, А. Сүйүмбаев атындагы стадион, Кара-Суу жана Өзгөн шаарларындагы курулуп жаткан стадиондор текшерилди.
Жыйындарга КФБнын вице-президенти Дастанбек Конокбаев, башкы катчысы Медербек Сыдыков жана Кыргыз профессионалдык футбол лигасынын президенти Асылбек Кадралиев, аймактык футбол ассоциациясынын жана муниципалдык органдардын өкүлдөрү катышты.
Ош шаарындагы А.Сүйүмбаев атындагы стадиондо административдик имараттардын абалы канааттандырарлык эместиги, ошондой эле чуркоо жолунун реконструкциясы өз убагында башталбагандыгы белгиленди. Жыйында ЛЭД-экранды орнотууну бүтүрүү маселеси да каралды.
Кара-Суу шаарындагы жаңы стадиондун курулуш аянтчасында аткарылып жаткан иштердин жүрүшү, газондун абалы жана имараттардын пландалышын оңдоо зарылдыгы талкууланды. Мындан тышкары, техникалык жана медиа зоналарды, күйөрмандар үчүн кошумча кириштерин уюштуруу тапшырмалары коюлду.
Өзгөн шаарынын стадионунда курулуш графигинен артта калуу жана жумуштардын жай темп менен жүрүшү боюнча маселеге көңүл бурулду. Трибуна конструкцияларына жана кириштерге байланыштуу кемчиликтер курулушту аткарып жаткан уюм тарабынан эске алынды. Кара-Суу жана Өзгөн шаарларындагы стадиондордун курулушу ушул жылдын күз айларында аякташы пландалууда.
Кыргыз футбол биримдиги өлкө боюнча футбол инфраструктурасын модернизациялоо багытындагы иштерди жергиликтүү органдар менен биргеликте улантууда.
