Бишкек, 30.11.25. /Кабар/. Ош облусунун аймагында 511 шайлоо тилкеси ачылып, добуш берүү жүрүүдө. Бул тууралуу президенттин аймактагы өкүлчүлүгүнөн билдиришти.
Маалыматка ылайык, облус боюнча жалпы 8 округ жана 811 миң 906 шайлоочу бар.
Президенттин өкүлү Элчибек Жантаев Кара-Суу районундагы №5220 шайлоо тилкесинде атуулдук милдетин аткарып, Жогорку Кеңештин депутаттарын мөөнөтүнөн мурда шайлоого аралыктан добуш берди.
Өкүл облус тургундарын шайлоо жараянына активдүү катышууга жана өлкөнүн келечегине кайдыгер карабоого чакырды. Ошондой эле бул жолу өлкөдө таза жана ачык шайлоо өткөрүү үчүн бардык шарттар түзүлгөнүн белгиледи.
Белгилей кетсек, бүгүн Кыргызстанда Жогорку Кеңештин депутаттарын мөөнөтүнөн мурда шайлоо өтүүдө. Өлкө боюнча 30 көп мандаттуу округ түзүлгөн. Ар бир округдан үчтөн депутат парламентке шайланып келет. Жалпысынан Жогорку Кеңеш 90 депутаттан турат.
