Бишкек, 27.11.25. /Кабар/. Ош облусу Жогорку Кеңештин депутаттарын мөөнөтүнөн мурда шайлоону өткөрүүгө толук даяр. Бул тууралуу облустагы шайлоо участкаларынын даярдыгын талкуулаган облустук штабдын отурумунда белгилүү болду.
Президенттин аймактагы өкүлчүлүгүнөн билдиришкендей, жыйын президенттин өкүлүнүн биринчи орун басары Илияз Ташбаевдин төрагалыгы алдында өтүп, жыйынга өкүлдүн аппарат жетекчиси, район акимдери, тиешелүү мекеме-ишканалардын жетекчилери жана күч түзүмдөрүнүн башчылары катышты.
Жыйында тиешелүү жетекчилер даярдык иштери тууралуу маалымат беришти. Анын негизинде облус саясий өнөктүктү өткөрүүгө толук даяр экенин белгилүү болду.
Жыйындын соңунда Илияз Ташбаев айрым кемчиликтерди тез арада жоюуну тапшырып, шайлоо күнүн тынч жана уюшкандыкта өткөрүүнүн маанисин белгиледи.
Белгилей кетсек, Ош облусунда жалпы 8 округ жана 510 шайлоо тилкеси бар.
Кыргызстанда Жогорку Кеңештин депутаттарын мөөнөтүнөн мурда шайлоо 30-ноябрга белгиленген.
