Бишкек, 06.08.26. /Кабар/. Ысык-Көл облусунун Бостери айылында Ош облусу менен Россиянын Иркутск облусунун ортосунда кызматташуу жөнүндө макулдашууга кол коюлду.
Президенттин Ош облусундагы өкүлчүлүгүнүн маалыматына ылайык, документке президенттин Оштогу өкүлү Аманкан Кенжебаев жана Иркутск облусунун губернатору Игорь Кобзев кол коюшту.
Жолугушууда тараптар соода-экономикалык, инвестициялык, өнөр жай, айыл чарба, кайра иштетүү, логистика, туризм, билим берүү, саламаттык сактоо жана кадрларды даярдоо тармактарындагы кызматташуу мүмкүнчүлүктөрүн талкуулашты.
Кол коюлган макулдашуу эки аймактын ортосундагы ишкердик байланыштарды кеңейтүүгө, биргелешкен инвестициялык долбоорлорду ишке ашырууга жана тажрыйба алмашууга өбөлгө түзөрү белгиленди.
