Бишкек, 13.05.26. /Кабар/. Ош шаарынын мэри Жанарбек Акаевдин эл менен жолугушуусу күндүн экинчи жарымында Жибек жолу муниципалдык аймактык башкармалыгында өттү.
Муниципалитеттен билдиришкендей, жыйында аймактын тургундары жол, электр мамычаларын жаңылоо, маршруттук каттамдарды көбөйтүү, билим берүү тармагындагы көйгөйлөрүн айтышты. Ошондой эле жеке маселеси менен келген жашоочулар да болду.
Мындан тышкары үйү сүрдүрүлгөн жарандар кенемте маселесин көтөрүштү. Мэр Жанарбек Акаев үйү толук бузулган жаранга шаар бийлиги үй берээрин убадалады.
Жанарбек Акаев билии берүү тармагындагы көйгөйлөргө да жооп берип, ата-энелерди балдардын келечегине кайдыгер болбоого чакырды.
"Балдарыңыздарды көбүрөөк окутуңуздар. Алар тил үйрөнүп, дүйнө кыдырсын. Биз аң-сезимибизди да өстүрүүбүз абзел. Ошондуктан мындан ары ушул аймактагы окуучулардын ЖРТдагы, олимпиадалардагы жыйынтыктарын өзгөчө карайбыз", - деди мэр.
Калаа башчысынын калк менен жолугушуусу эртең да башка аймактарда уланат.
Белгилей кетсек, президенттин тапшырмасы менен өлкөнүн бардык аймактарында жергиликтүү бийлик өкүлдөрү эл менен жолушуп, көйгөйлөрүндү жеринде чечишүүдө.
