Бишкек, 03.10.25. /Кабар/. «Ош» бажысы тарабынан Евразия экономикалык бирлигинин аймагына синтетикалык балык уулоочу торлорду ташып келүү аракетине бөгөт коюлду.
Бажы кызматынан билдиришкендей, Кытайдан Эркечтам өткөрүү пункту аркылуу ЕАЭБ аймагына транзиттик жүк катары унаа тетиктер деп көрсөтүлгөн унаа кирген. Текшерүү учурунда жүктүн ичинен жалпы салмагы 746,39 кг болгон балык уулоочу торлор табылган. Товарлар “Каратай” убактылуу сактоо кампасына убактылуу киргизилген.
Факт каттоого алынып, материалдар Мамлекеттик бажы кызматынын Тергөө башкармалыгынын түштүк аймактык бөлүмүнө өткөрүлүп берилди.
Текшерүүнүн жыйынтыгында товарлар "жок кылуу" жол-жобосу менен таризделип, 2025-жылдын 30-сентябрында Жаратылыш ресурстар, экология жана техникалык көзөмөл министрлигинин өкүлдөрүнөн турган комиссия тарабынан жок кылынды.
Мамлекеттик бажы кызматы президенттин 2022-жылдын 26-апрелиндеги № 131 жарлыгына жана министрлер кабинетинин 2023-жылдын 24-ноябрындагы №624 токтомуна ылайык, синтетикалык балык уулоочу торлорду Кыргыз Республикасынын аймагына ташып кирүүгө тыюу салынганын эскертет жана тышкы экономикалык ишмердүүлүктүн катышуучуларын колдонуудагы бажы мыйзамдарын так сактоого чакырат.
