Бишкек, 26.02.26. /Кабар/. "Ош" эл аралык аэропортундагы жаңы аэробекет комплексинин курулушу кызуу жүрүүдө. Бул тууралуу Курулуш, архитектура жана турак жай-коммуналдык чарба министрлигинен билдиришти.
Нурдан Орунтаев аэропорттун аймагында курулуп жаткан жаңы аэробекет комплексинин курулуш иштери менен таанышты.
Аэробекет комплексинин жалпы аянты 26 миң чарчы метрди түзөт. Имарат алты блоктон - А1, А2, Б1, Б2, В1 жана В2 бөлүктөрүнөн турат. Курулуш иштери 2025-жылдын 25-апрелинде башталган.
Бүгүнкү күндө монолиттик иштер 95%, ал эми жертөлөдөгү инженердик тармактарды монтаждоо 80%га аткарылды. Биринчи кабаттагы курулуш долбоордук документтерге өзгөртүүлөр киргизилип жаткандыктан убактылуу токтоп турат.
Министр курулушту сапаттуу жана өз мөөнөтүндө бүтүрүүнү, ошондой эле жумушчулардын санын көбөйтүү менен иштин темпин тездетүүнү тапшырды.
Белгиленгендей, учурда объектте 120 жумушчу иштеп жатат, жакында алардын санын эки эсеге көбөйтүү пландалууда. Курулуш иштери бекитилген графикке ылайык жүрүүдө.
