Бишкек, 16.07.26. /Кабар/. "Бишкек жашыл курулуш" муниципалдык ишканасы өзүнүн жеке гүл дүкөнүн ачты.
Муниципалитеттен билдиришкендей, эми борбор калаанын тургундары жана коноктору ишкананын адистери өстүргөн гүлдөрдү жана идишке отургузулган декоративдик өсүмдүктөрдү ортомчусуз, түз сатып ала алышат.
Жаңы дүкөндүн салтанаттуу ачылыш аземи Ташкент көчөсү, 17 дарегинде жайгашкан ишкананын аймагында өттү. Иш-чарага Бишкек шаарынын мэринин орун басары Рамиз Алиев жана "Бишкек жашыл курулуш" муниципалдык ишканасынын директору Адилет Абылбеков катышып, кызыл лентаны кесишти.
Гүл дүкөнүнүн ачылышы ишкананын өнүгүүсүндөгү маанилүү кадам болуп саналат. Бул кадам шаардыктарга сапаттуу гүлдөрдү түз эле өндүрүүчүдөн арзан жана ишенимдүү баада алууга шарт түзөт. Дүкөндө сунушталган бардык продукциялар "Бишкек жашыл курулуштун" жеке күнөсканаларында жогорку стандарттарды сактоо менен өстүрүлгөн.
Ишкана борбор калаанын тургундарын жана конокторун Ташкент көчөсү, 17 дарегиндеги жаңы гүл дүкөнүнө чакырат. Бул жерден адистердин мээрими менен өстүрүлгөн бөлмө гүлдөрүнүн жана декоративдик өсүмдүктөрдүн кеңири түрүн таба аласыз.
