Бишкек, 14.10.25. /Кабар/. Орловка шаарынын мэриясы мамлекеттик-жеке өнөктөштүк алкагында ишке ашырылуучу «Орловка шаарындагы эски жылуулук борборун газобетон блокторун чыгарган заводго реконструкциялоо» долбоору боюнча жеке өнөктөштү тандоо үчүн конкурс жарыялады.
Мамлекеттик-жеке өнөктөштүк борборунан билдиришкендей, долбоордун алкагында мурдагы жылуулук электр станциясынын ордуна заманбап курулуш материалдарын, атап айтканда газобетон блокторун чыгаруучу өндүрүштүк комплекс куруу пландалууда.
Долбоордун негизги параметрлери:
- Объекттин жалпы аянты: 25 000 чарчы метр;
- Жылдык өндүрүштүк кубаттуулугу: 90 000 куб метр газобетон блогу.
Долбоордун максаты - суроо-талапка ээ болгон курулуш материалдарын чыгарган жана аймактын өнөр жай потенциалын өнүктүрүүгө салым кошкон заманбап ишкана түзүү.
МЖӨ борбору мамлекеттик-жеке өнөктөштүк механизми муниципалдык бийлик менен жеке сектордун ортосунда тобокелдиктерди оптималдуу бөлүштүрүүгө, социалдык-экономикалык максаттарга жетишүүгө, бюджеттик каражаттарды натыйжалуу пайдаланууну камсыз кылууга мүмкүндүк берерин белгилейт.
Квалификацияларга суроо МЖӨ борборунун www.ppp.gov.kg сайтында жеткиликтүү.
Тандоого катышуу үчүн арыздар 2025-жылдын 13-ноябрына чейин, саат 18:00гө чейин төмөнкү дарекке кабыл алынат: Орловка, Кудряшов көчөсү 16 (мэрия имараты), же курьердик кызмат аркылуу почта менен жөнөтсө болот.
Маалымат үчүн байланыш телефондору:
Орловка шаарынын мэриясы — тел.: +996 709 593 789;
Кыргыз Республикасынын МЖӨ борбору — тел.: 30 01 76.
