Бишкек, 02.10.25. /Кабар/. "Манас" аэропортунда iPhone 17 Pro Max үлгүсүндөгү телефондорду мыйзамсыз алып кирүү аракетине бөгөт коюлду. Бул тууралуу Мамлекеттик бажы кызматынан билдиришти.
Мыйзамсыз аракеттерди аныктоо УКМК кызматкерлери менен биргеликте жүргүзүлүп, Дубай шаарынан келген жүргүнчүлөрдү бажы көзөмөлүнөн өткөрүүдө бажы мыйзамдарын бузуу фактысы аныкталган.
Анда Дубайдан учуп келген 1992-жылы туулган С.А. жана А.Б. аттуу жарандар ЕАЭБ өлкөлөрүнөн келген жарандар чыгуучу коридордон өтүп, тиешелүү бажы операцияларын жүргүзбөстөн уюлдук телефондорду жашыруун алып өтүүгө аракет кылышкан.
Кийинчерээк аталган товарларды Айчүрөк БУМ соода борборундагы "N.S." жана "C.B.S." бутиктеринде сатуу аракети учурунда 18 даана iPhone 17 Pro Max уюлдук телефондору алынган.
КР Соода-өнөр жай палатасынын корутундусуна ылайык, бир даана iPhone 17 Pro Max телефонунун орточо баасы 195 миң сомдон 225 миң сомду түзгөн.
Мамлекеттик бюджетке төлөнүүгө тийиш болгон бажы төлөмдөрүнүн жалпы суммасы 476 271 сомду түздү.
Бул факты каттоого алынып, чогултулган материалдар МБКнын Тергөө башкармалыгына өткөрүлүп берилди.
