Бишкек, 25.09.25. /Кабар/. КР президентине караштуу Инвестициялар боюнча улуттук агенттиктин директору Равшанбек Сабиров менен Башкы прокуратуранын Ишкерлердин укуктарынын сакталышын көзөмөлдөө башкармалыгынын башчысы Мирлан Ашырбаевдин жумушчу жолугушуусу өттү.
Агенттиктен билдиришкендей, жыйындын жүрүшүндө Башкы прокуратуранын өкүлдөрү ишкерлердин жана инвесторлордун укуктарын коргоого багытталган ишмердүүлүгү, ошондой эле бизнес процесстерине көзөмөлдөөчү органдардын негизсиз кийлигишүүсүнүн алдын алуу боюнча көрүлүп жаткан чаралар тууралуу маалымат беришти.
Тараптар ишкерлер менен инвесторлордун алдында турган актуалдуу маселелерди талкуулап, укуктук кепилдиктерди бекемдөөгө жана өлкөдөгү бизнес климатты жакшыртууга багытталган кызматташуунун артыкчылыктуу багыттарын аныкташты.
Жолугушуунун жыйынтыгында тараптар ишкердикти колдоого жана Кыргызстандын инвестициялык жагымдуулугун өнүктүрүүгө багытталган мындан аркы кызматташуу жана биргелешкен демилгелерди ишке ашырууну макулдашты.
