Бишкек, 11.05.26. /Кабар/. Президент Садыр Жапаровдун тапшырмасынын негизинде, бүгүн, 11-майда Баткен облусунун башчысы Мамыржан Рахимов Кызыл-Кыя шаарынын тургундары менен жолугушту.
Өкүлчүлүктөн билдиришкендей, жолугушууга жалпысынан 300гө жакын тургун катышып, 50дөн ашуун суроо-талап жана кайрылуулар айтылды.
Жолугушуунун жүрүшүндө жарандар негизинен турак жай куруу үчүн жер тилкелерин алуу, таза суу менен камсыздоо, мунапыс маселеси, аз камсыз болгон үй-бүлөлөрдүн социалдык абалы, жашаган жери боюнча каттоого туруудагы көйгөйлөр, жаңы жумуш орундарын түзүү, шаардын инфраструктурасын өнүктүрүү жана жеке укуктук маселелер боюнча суроолорун беришти.
Көтөрүлгөн маселелердин айрымдары жеринде чечилип, тиешелүү мамлекеттик органдардын жетекчилерине конкреттүү тапшырмалар берилди. Ал эми кошумча убакытты жана тиешелүү изилдөөнү талап кылган кайрылуулар көзөмөлгө алынып, тийиштүү кызматкерлер жеринде иш алып барууда.
Жыйынга облус башчысы менен бирге облустук мекеме-ишканалардын жетекчилери, жергиликтүү бийлик өкүлдөрү катышып, ар бир жарандын кайрылуусу боюнча жекече түшүндүрмө берип, тиешелүү иштерди алып барууда.
Жолугушуунун максаты — эл менен түз байланышта болуп, жарандардын көйгөйлөрүн ыкчам жана натыйжалуу чечүү болуп саналат.
Белгилей кетсек, облус башчысынын Баткен облусунун тургундары менен жолугушуулары бекитилген графиктин негизинде бардык район-шаарларда улантылат.
Жолугушуу УТРК Баткен телеканалы аркылуу түз эфирде көрсөтүлдү.
