Бишкек, 19.03.26. /Кабар/. Нооруз майрамына карата Ош облусунун аймагында 1000ден ашуун милиция кызматкери коомдук коопсуздукту камсыздайт. Бул тууралуу бүгүн өздүк курамдын кызмат өтөөгө даярдыгын текшерүү максатында өткөрүлгөн саптык кароо учурунда белгилүү болду.
Президенттин аймактагы өкүлчүлүгүнөн билдиришкендей, саптык кароонун жүрүшүндө кызматкерлерге коомдук тартипти сактоо, кылмыштуулуктун алдын алуу, жол коопсуздугун камсыз кылуу боюнча так тапшырмалар берилди.
Иш-чарага катышкан облус жетекчиси Аманкан Кенжебаев Нооруз элдик майрамы учурунда милиция кызматкерлери аймактарда күчөтүлгөн тартипте иш алып барарын белгилеп, жарандарды мыйзамдарды сактоого чакырды.
