Бишкек, 23.04.26. /Кабар/. Ноокен райондук аскер комиссариатынын жаңы имаратынын курулушу башталды. Бул тууралуу Коргоо министрлигинен билдиришти.
Имараттын пайдубалына капсула салуу аземинде коргоо министри Руслан Мукамбетов сөз сүйлөдү. Анын айтымында, жаңы объект аскердик башкаруу органдарынын ишин жакшыртууга, жарандарды аскердик эсепке алуу жана мобилизациялык даярдыктын деңгээлин жогорулатууга шарт түзөт. Ошондой эле министр өлкөнүн коргонуу жөндөмдүүлүгүн чыңдоодо инфраструктуралык долбоорлордун мааниси зор экенин баса белгиледи.
Курулуш иштери 2026-жылдын IV кварталында аяктап, имарат заманбап талаптарга ылайык пайдаланууга берилери күтүлүүдө.
Эскерте кетсек, учурда Сокулук, Ак-Талаа жана Ат-Башы райондук аскер комиссариаттарында да ушундай эле курулуштар жүрүүдө. Мындан тышкары, Кара-Суу биргелешкен шаардык аскер комиссариатынын жаңы имаратынын курулушуна да старт берилген.
