Бишкек, 17.04.25. /Кабар/. Бүгүн Ноокат районунун Жаңы-Ноокат айыл аймагында "Гармент" ЖЧК тарабынан курулган заманбап тигүү цехи ачылды. Бул тууралуу президенттин Ош облусундагы өкүлчүлүгүнөн билдиришти.
Жеке ишке тарабынан курулган үч кабаттуу имараттын жалпы сметалык баасы 24,2 млн сомду түзөт.
Ишканада негизинен аялдар үчүн көйнөк-шым, көйнөк, юбка сыяктуу сапаттуу кийимдер тигилет. Учурда цехте 70 кызматкер эмгектенүүдө, ал эми жакынкы келечекте бул көрсөткүчтү 200гө жеткирүү пландалууда.
Облус жетекчиси Элчибек Жантаев ишкананын ишмердүүлүгү менен жакындан таанышып, айыл жеринде мындай өндүрүш ишканасынын ачылышы – калкты жумуш менен камсыздоонун жана жергиликтүү бюджетти көтөрүүнүн маанилүү кадамы экенин белгиледи.
"Цехте чыгарылган продукциялар Россия өлкөсүнө экспорттолот. Толук кубаттуулукта иштеп баштаганда айына 100 миң долларга чейин продукция өндүрүү мүмкүнчүлүгүнө ээ болот. Бул экономикалык өсүшкө жана жаңы жумуш орундарын түзүүгө чоң салым кошот",-деп айтылат маалыматта.
