Бишкек, 24.02.25. /Кабар/. Бүгүн Нарын облусунун жол тейлөө ишканаларына атайын техникалар тапшырылды. Бул тууралуу президенттин аймактагы өкүлчүлүгүнөн билдиришти.
Маалыматка караганда, техникаларды президенттин өкүлү Алтынбек Эргешов тапшырды.
Техникалык базаны чыңдоо, жол куруу, оңдоо иштерин тездетүү жана сапатын жогорулатуу максатында министрлер кабинети тарабынан республикадагы Жол тейлөө ишканаларына атайын техникалар алынган. Андан Нарын облусундагы 9 жол тейлөө ишканасына 73 техника бөлүнүп берилген. Алар:
- 9 даана автогрейдер;
- 9 даана 15 тонналык автосамосвал;
- 9 даана каток(тротуарный);
- 9 даана асфальт кескич(фреза);
- 9 даана таптагыч(ручной каток);
- 9 даана компрессор;
- 4 даана кран-манипулятор;
- 4 даана кум чачкыч жана алдыңкы калагы бар машина;
- 3 даана автомашина (дубль кабина)
- 1 даана автогудронатор (битум чачуу);
- 2 даана автопогрузчик;
- 1 даана МДК (кар тазалоочу техника);
- 1 даана асфальтоукладчик;
- 1 даана экскаватор;
- 1 даана асфальто-бетон заводу;
- 1 даана таш талкалоочу жабдуу.
Иш-чарада облус башчысы жолчуларды жаңы техникалуу болушу менен куттуктап, алардын жумушуна ийгилик каалоо менен бирге, техниканы өз кызыкчылыкка пайдаланып жибербей, аяр мамиле жасоо керектигин эскертти.
"Бул техника сиздердин ишиңиздерди тездетет жана жолдордун сапатын жакшыртууга чоң салым кошот деген ишеничтемин. Биздин эң негизги максатыбыз — жолдорду сапаттуу куруп, тургундарга ыңгайлуулукту камсыздоо. Техниканы өз кызыкчылыгыңыздарга пайдаланып жибербей, аяр пайдалануу керек. Жолдордун абалын, сапатын үзгүлтүксүз көзөмөлдөп турмакчыбыз", — деди А.Эргешов.
Жолдордун абалынын жакшыртылышы элдин күнүмдүк турмушундагы өтө маанилүү аспект болуп, ар бир курулган же оңдолгон жол өлкөнүн өнүгүүсүнө чоң салым кошорун белгиледи.
